काठमाडौं । कम्प्युटर हार्ड डिस्क तथा हार्ड ड्राइभ जस्ता उपकरण आयात गर्दा सरकारी नियम छलेको पाइएको छ । पैठारीकर्ताले विभिन्न प्रकारका स्टोरेज डिभाइस आयात गर्दा कम्प्युटर सर्भर तथा नेटवर्क सर्भर उल्लेख गरी कर छली भएको महालेखा परीक्षकको प्रतिवेदनको निष्कर्ष छ ।
सुक्खा बन्दरगाह, वीरगन्ज र त्रिभुवन विमानस्थल भन्सार कार्यालयबाट विभिन्न पैठारीकर्ताले यसरी सामान भित्र्याएको उल्लेख छ । डेटा स्टोरेज डिभाइसको ब्रान्ड, मोडल, स्पेसिफिकेसन, युजर म्यानुअल र त्यस्ता डिभाइसहरूको अन्तर्राष्ट्रिय भन्सार जाँचपासको अभ्यास अध्ययन र परीक्षण समेत महालेखाले गरेको छ ।
जसअनुसार यस्ता डिभाइस भन्सार उपशीर्षक ८४७१७०९० (अन्य सञ्चय एकाइ) अन्तर्गत पर्ने र त्यसमा ५ प्रतिशत अन्तःशुल्क र १३ प्रतिशत मूल्य अभिवृद्धि कर (भन्सार) लगाई जाँच पास गर्नुपर्ने थियो । तर पैठारीकर्ताले ८४७१५०१० (कम्प्युटर तथा नेटवर्क सर्भर), ८५२३८०१० (सफ्टवेयरहरू) लगायतका भन्सार उपशीर्षकबाट मूल्य अभिवृद्धि कर मात्र लगाएर जाँचपास गरिएको प्रतिवेदनले जनाएको छ ।
यसरी फरक उपशीर्षकबाट जाँचपास गर्दा भन्सार शुल्क र अन्तःशुल्क गरी दुई करोड ९० लाख ४१ हजार रुपैयाँ छली भएको छ । उक्त रकम असुलउपर गर्न महालेखाले सरकारलाई सुझाव समेत दिएको छ ।
यस बाहेक मेन बोर्ड टेलिभिजन सिग्नल रिसिभर सेटअप बक्स पाटपुर्जा भएकोमा छापिएका परिपथको नाममा भित्र्याइएको र त्यसबाट छली भएको १ करोड ८० लाख ६ हजार रुपैयाँ समेत असुल गर्नुपर्ने बताइएको छ ।
COMMENTS