बीरगंज । पर्सा प्रहरीले झन्डै ९ करोड ३० लाख मूल्य बराबरको ९ किलो ३ सय ग्राम अवैध लागु औषध अफिमसहित एक जनालाई पक्राउ गरेको छ ।
प्रहरी चौकी रङ्गपुरबाट खटिएको गस्ती टोलीले पर्साको पटेर्वासुगौली गाउँपालिका वडा नम्बर २ मनवाबाट रंगपुरतर्फ आउँदै गरेको प्रदेश नं.२–०३–००७ प ६९९० नम्बरको मोटरसाइकल रोकी चेकजाँच गर्दा ९ किलो ३ सय ग्राम अवैध लागु औषध अफिमसहित मकवानपुर राक्सीराङ गाउँपालिका वडा नं.४ बस्ने ३० वर्षीय सुजन मोक्तानलाई रंगेहात पक्राउ गरेको हो ।
निजले भिरेको कालो रङ्गको ब्यागभित्र सेतो प्लास्टिकको झोलामा ९ किलो ३ सय ग्राम अफिमको लेदो फेला परेको जिल्ला प्रहरी कार्यालय पर्साका प्रवक्ता एवं डिएसपी ओम प्रकाश खनालले जानकारी दिनुभयो ।
अफिमसहित भरिया पक्राउ परे पनि चेकजाँचकै क्रममा प्रहरीलाई छलेर मोटरसाइकल चालक भने फरार भएको र निजको पहिचान भइसकेको हुँदा खोजतलास भइरहेको डिएसपी खनालले बताउनुभयो ।
पक्राउ परेको अफिम स्थानीय बजारमा प्रति १ ग्राम नेपाली रुपैयाँ १० देखि ११ हजारसम्म खरिद बिक्री हुने गरेको डिएसपी खनालले जानकारी दिनुभयो ।
पक्राउ परेका अभियुक्तलाई अवैध लागु औषध मुद्दामा पर्सा जिल्ला अदालतमा म्याद थप गरी कारबाही अगाडी बढाइएको जिल्ला प्रहरी कार्यालय पर्साका प्रहरी उपरीक्षक रमेश बस्नेतले बताउनुभयो ।
COMMENTS