रुपन्देही । ग्रामीण क्षेत्रमा व्यवस्थित पशु हाटबजार नहुँदा समस्या झेलेका रुपन्देहीको दक्षिणी क्षेत्रका किसानलाई सहजता बनाउने गरी हाटबजार सञ्चालनमा ल्याइएको छ ।
सियारी गाउँपालिका–२, च्याङ्गठामा विश्व बैङ्कको पाँच करोड ऋण अनुदानमा हाटबजार तयार भएपछि स्थानीयलाई सहज भएको हो । लुम्बिनी प्रदेशका मुख्यमन्त्री कुलप्रसाद केसीले बजारको शुभारम्भ गर्दै ग्रामीण क्षेत्रमा यस्ता हाटबजारले किसानलाई सहज हुने बताउनुभयो ।
हाटबजारमा पशुको स्वास्थ्य जाँच, तिनीहरूको खरिद बिक्री, दाना पानी खुवाउने व्यवस्था गरिएको छ । गाई भैँसी बिक्री नभए केही दिनलाई होल्डिङ सेन्टरमा राख्न सकिन्छ । किसान तथा व्यापारीलाई खाजा, खाना र आराम गर्ने स्थल बनेको छ । पशु हाटबजारमा प्राविधिक र व्यवस्थापकीय सेवा गाउँपालिकाले गर्ने छ । उत्पादनशील गाईभैँसी र मासुका लागि पाडो, राँगो र भैँसी राख्ने व्यवस्था छ ।
हाटबजार सञ्चालनका व्यवस्थापनका लागि खरिद कर्ताबाट भने तीन सय रुपैयाँ लिने गाउँपालिकाले जनाएको छ । पशु हाटबजार दुई विघा क्षेत्रफलमा फैलिएको छ । यहाँबाट एक हजार पशु चौपाया खरिद बिक्री गर्न सकिन्छ ।
किसानलाई गाई भैँसीको बजारीकरणमा सहज होस् भन्ने उद्देश्यका साथ नेपाल लाइभ स्टक सेक्टर इनोभेसन आयोजनाले हाटबजार निर्माण गरेको आयोजना प्रमुख गान्धीराज उपाध्यायले बताउनुभयो ।
हाटबजारमा पशु चिकित्सकको व्यवस्था गरिएको छ । जहाँ किसानले ल्याएका पशु चौपायाको निःशुल्क उपचार हुने गाउँपालिकाका पशु शाखा प्रमुख गणेश खनालले जानकारी दिनुभयो । अत्याधुनिक पशु हाटबजारमा निःशुल्क विशेषज्ञ चिकित्सकीय सेवा लिन पाइने भएपछि किसानहरू खुसी भएका छन् ।
हाटबजारमा पशु चौपाया बिक्री गर्दा उचित मूल्य पाइने र सहज रुपमा बिक्री गर्ने वातावरण तयार भएको किसानहरूको अनुभव छ । धेरै व्यापारीसँग मोलतोल गर्न सकिने भएकाले पनि किसानहरूले आफ्नो उचित मूल्य पाउने विश्वास गरेको मायादेवी गाउँपालिकाका किसान दिपचन्द्र यादवले बताउनुभयो ।
हाटबजार सञ्चालनका लागि समिति गठन गरिएको छ । सियारी च्याङ्गठा पशु हाटबजार सञ्चालक समितिले साप्ताहिक हाटबजार अन्तरगत हरेक आइतबार बजार सञ्चालनमा ल्याउने गाउँपालिका अध्यक्ष थानेश्वर घिमिरेले बताउनुभयो ।
COMMENTS