तराईमा जाडो बढ्यो, वृद्धवृद्धा र बालबालिका बढी प्रभावित

पुस १९, २०७८ .  एक सातादेखि पश्चिमी हावासँगै चलेको शीतलहरले रौतहट, बारा लगायत मध्यतराईमा जाडो बढेको छ । शनिबार र आइतबार दिनभरी घाम नलागेका क...

पुस १९, २०७८ . 

एक सातादेखि पश्चिमी हावासँगै चलेको शीतलहरले रौतहट, बारा लगायत मध्यतराईमा जाडो बढेको छ । शनिबार र आइतबार दिनभरी घाम नलागेका कारण कठ्याङ्ग्रिँदो जाडो सहन कठिन भएको बूढापाकाको गुनासो छ ।

जाडो बढे पनि स्थानीय सरकार र स्थानीय प्रशासनले सार्वजनिक स्थल, चोक, मठमन्दिरमा दाउराको जोहो गर्न सकेका छैनन् । जाडोको बेला गौरस्थित बीपी चोक, गरुडा, चन्द्रपुर, कटहरियाको चोकहरुमा विगतका वर्षहरुमा स्थानीय प्रहरी प्रशासनले दाउरा बाल्ने गरेका थिए ।

खास गरेर जाडोका कारण दलित, विपन्न, वृद्धवृद्धा, बालबालिका सबभन्दा बढी प्रभावित भएको चिकित्सकहरु बताउँछन् । उनीहरुमा चिसोका कारण हुने बिमारी देखिएको छ । रौतहटका प्रमुख जिल्ला अधिकारी कृष्णबहादुर शाहीले लगातार जाडो बढ्दै गएकाले अब छिटै जिल्लाको सबै स्थानीय तहको चोकचोकमा दाउरा बाल्ने व्यवस्था गर्न लागेको बताए ।

जाडो बढेसँगै बारा, पर्सा, रौतहट लगायतका जिल्लामा न्यानो कपडाको कारोबार बढेको छ । जाडो छल्न न्यानो कपडा खरिद गर्ने सर्वसाधारणको भिड बढेको छ । गौर, कटहरिया, कलैया बजारका प्रायः सबै कपडा पसल ग्राहकले भरिभराउ हुने गरेका छन् । छठ पर्वपछि सेलाएको कपडा व्यवसाय जाडोकै कारण चलायमान बनेको व्यापारीहरू बताउँछन् ।