वीरगंज । वीरगंज भन्सार कार्यालयले १७ करोड भन्दा बढी बेरुजु रकम दाखिला नगर्ने १८६ फर्म तथा कम्पनीको कारोबार रोक्का गर्ने निर्णय गरेको छ ।
वीरगंज भन्सारले एक सूचना जारी गर्दै एसियन पेन्टस, युनिक फर्मास्युटिकल वीरगंज, नेपाल टेलिकम, भ्याली कोल्ड स्टोर, पतञ्जली आयुर्वेद, अर्किड इन्टरनेशनल, मारुती फर्मा पर्सा, नेशनल हेल्थ केयर बारा, ऋद्धिशिद्धी इन्टरप्राईजेज पर्सा, यतिपोलिकेम प्रा.लि. सहितका १ सय ८६ कम्पनीको कारोबार रोक्का राख्ने निर्णय भएको वीरगंज भन्सार कार्यालयका प्रमुख भन्सार अधिकृत हरिहर पौडेलले बताउनुभयो ।
पटक–पटक ताकेता गर्दा पनि भन्सार कारोबारको दायित्व चुक्ता गर्न नआएपछि कारोबार रोक्काको निर्णय गरिएको पौडेलले जानकारी दिनुभयो । कारोबार रोक्का गरिएका फर्महरूले वर्षौँ देखिको बेरुजु रकम चुक्ता गर्न नआएको र अधिकांश कम्पनीहरूको १ लाख देखि ४० लाखसम्म बेरुजु फर्स्यौट गर्न बाँकी रहेको पौडेलले बताउनुभयो ।
केही कम्पनीले आर्थिक वर्ष २०६०÷६१ देखिको बक्यौता दाखिला नगरेको वीरगंज भन्सारको तथ्याङ्कमा उल्लेख छ । यस्ता कम्पनीको कुल बक्यौता १७ करोडभन्दा माथि रहेको भन्सार प्रमुख पौडेलले बताउनुभयो ।
वीरगंज भन्सारले कारोबार रोक्का गर्ने निर्णयपछि अब कम्पनीहरू बेरुजु तिर्न बाध्य हुने भन्सार कार्यालयले जनाएको छ ।
प्रतिक्रिया