सीएफआरडीको सहयोगमा विश्रामपुरको दुई स्कूलमा १६० साईकल वितरण, विद्यार्थीहरु हर्षित"

दिपेन्द्र चौधरी सहनी 

बिरगंज ,पर्सा 

"सीएफआरडीको सहयोगमा विश्रामपुरको दुई स्कूलमा १६० साईकल वितरण, विद्यार्थीहरु हर्षित"

चाइना फाउण्डेशन फर रुरल डेभलपमेन्ट (सीएफआरडी)को सहयोगमा बाराको विश्रामपुर गाउँपालिका वडा नं. ३ र ४ का दुई वटा विद्यालयहरुमा साईकल वितरण गरेको छ ।

अन्तर्राष्ट्रिय साइकल परियोजना अन्तर्गत आईतवार बारा जिल्लाको विश्रामपुर गाउँपालिका वडा नं ३ मुसहर्वा टोल स्थित श्री नेपाल राष्ट्रिय माध्यमिक विद्यालयमा अध्यनरत ८० जना बिद्यार्थी र वडा नं. ४ वलिरामपुर स्थित श्री नेपाल राष्ट्रिय माध्यमिक विद्यालयमा अध्यनरत ८० जना विद्यार्थी गरी १६० जना विद्यार्थीहरुलाई साइकल वितरण गरिएको छ ।

मधेश प्रदेशका ९ वटा सामुदायिक विद्यालयमा १ हजार विद्यार्थीहरुलाई एक÷एक थान साईकल वितरण गर्ने उदेश्य अनुरुप आईतवार १६० जना विद्यार्थीहरुलाई साइकल वितरण गरिएको आयोजकले जनाएको छ ।

सो साइकल वितरण कार्यक्रमले ग्रामीण क्षेत्रका बालबालिकाको शिक्षामा सहज पहुँचका साथै यातायातका चुनौतीहरूलाई सम्बोधन हुने विश्वास व्यक्त गरिएको छ । 

श्री नेरामावि मुसहर्वामा विश्रामपुर–३ का वडाध्यक्ष शिवचन्द्र प्रसाद यादवको अध्यक्षतामा आयोजित कार्यक्रममा प्रधानाध्यापक जुगुल किशोर साह, शिक्षक शिक्षिका, विद्यार्थी एवं अभिभावकहरुको सहभागिता रहेको थियो ।

त्यसैगरी नेरामावि बलिरामपुरमा बिद्यालय व्यवस्थान समितिका अध्यक्ष पतिलाल साहको अध्यक्षतामा आयोजित सो कार्यक्रममा प्रमुख अतिथि वडा नं. ४ का वडाध्यक्ष किसोरी साह, त्यसैगरी पुर्व वडा अध्यक्ष मदन प्रसाद यादव, विशिष्ट अतिथि चाईना फाउन्डेसन फर रुरल डेभलपमेन्टका कबित नेपाल, कृतिसा श्रेष्ठ, पिंकी श्रेष्ठ, बारा जिल्ला निवासी डा. धन्नजय यादव, श्री नेरामावि बलिरामपुरका प्रधानाध्यापक आनन्द कुमार गुप्ता लगायतको उल्लेखनिय सहभागिता रहेको थियो । 

सो कार्यक्रमका प्रमुख अतिथि एवं प्रधानाध्यापकहरुले कार्यक्रमको प्रशंसा गर्दै “यो सहयोगले विद्यार्थीहरूलाई नियमित रूपमा र समयमै कक्षाहरूमा उपस्थित हुन, शैक्षिक कार्यसम्पादन र समग्र सिकाइ नतिजामा सुधार गर्न सहयोग पुग्ने बताएका थिए । 

दुई वटै स्कूलमा आयोजित साईकल वितरण कार्यक्रममा वक्ताहरुले आयोजक संस्थालाई धन्यबाद दिदै आउने दिनहरुमा पनि यो स्कूललाई प्राथमिकतामा राखी स्कूललाई सहयोग गर्न आग्रह समेत गरेका थिए । लामो दुरीबाट अध्ययन गर्न आउने विद्यार्थीहरु लाभान्वित हुने उदेश्यले गरिएको यो कार्यक्रमबाट विद्यार्थीहरु निकै हर्षित देखिएका थिए ।