जनकपुरधाम । धनुषामा बिहानदेखि चलेको हावाहुरीका कारणले रुख ढल्दा रुखको हाँगाले च्यापिएर दुई जना विद्यार्थीको आज मृत्यु भएको छ ।
मृत्यु हुनेमा सवैला नगरपालिका वडा नंं १२ का महेन्द्र सदाका छोरी वर्ष ८ का प्रतिमा कुमारी सदा र चन्देश्वर सदाको छोरा वर्ष ७ अरबिन्द सदाको मृत्यु भएको धनुषाका प्रहरी उपरीक्षक वसन्त रजौरेले जानकारी दिनुभएको छ ।
धनुषाको सबैला नगरपालिका वडा नंं १२ स्थित फकिरचन्द माध्यमिक विद्यालय बरकुर्वाको प्राङ्गणमा रहेको मसालाको रूख ढल्दा दुवै जना विद्यार्थीको च्यापिएर गम्भीर घाइते भएकोमा उपचारका लागि अस्पताल लैजाँदै गर्दा बाटोमा नै मृत्यु भएको प्रहरी उपरीक्षक रजौरेले जानकारी दिनुभयो ।
दुवै जना विद्यार्थीको टाउकोमै गम्भीर चोट लागेर अत्यधिक रक्तस्राव भएका कारणले मृत्यु भएको प्रहरीले जानकारी दिएको छ ।
गए रातिदेखि चलेको हावाहुरीले मधेस प्रदेशको जनजीवन प्रभावित भएको छ । यसैगरी धनुषामा हावाहुरीका कारणले धेरै व्यक्तिको घरको छाना उडाएको र सोको तथ्याङ्क सङ्कलन गर्ने काम भइरहेको प्रहरीले जनाएको छ ।
COMMENTS