बीरगंज । पर्सा राष्ट्रिय निकुञ्जको अवरोधको कारण सुवर्णपुरमा सञ्चालित घोडे मसान शितलपुर सिँचाइ आयोजनाको काम ८ वर्षदेखि अलपत्र भएको छ ।
ठोरी गाउँपालिका वडा नम्बर ५ सुवर्णपुरका बासिन्दाको अगुवाइमा शितलपुर सिँचाइ उपभोक्ता समिति गठन गरी आर्थिक बर्ष २०७२÷०७३ मा सुरु गरिएको सिँचाइ आयोजनाको निर्माण कार्य पर्सा राष्ट्रिय निकुञ्ज प्रशासनले इआइएका लागि अनुमति नदिँदा ठूलो रकम खर्च भइसकेर पनि परियोजना बीचमै अलपत्र परेको निर्माण समितिका अध्यक्ष तथा तत्कालीन सुवर्णपुर गाविसका अध्यक्ष जरी लामाले बताउनुभयो ।
निकुञ्जको कोर एरियामा यो सिँचाइ आयोजनाको मुहान पर्ने भएकाले निकुञ्जको सहयोग र अनुमति आवश्यक पर्न गएको र हालसम्म निकुञ्ज प्रशासनले कुनै निकास नदिँदा आफूहरू समस्यामा परेको लामाले बताउनुभयो ।
सुवर्णपुरमात्र नभई छिमेकी जिरा भवानी गाउँपालिकाको वडा नं १,२ र ५ को समेत गरी २ हजार १ सय हेक्टर खेतीयोग्य जग्गालाई सिञ्चित गर्न सक्ने यो सिँचाई आयोजनामा नेपाल सरकारबाट प्राप्त १ करोड ३६ लाख रुपैयाँ बजेट समेत खर्च भइसकेको लामाले बताउनुभयो ।
निकुञ्जको घोडे मसान खोलाबाट निकुञ्ज बाहिरसम्म २५ किमी लामो नहर ल्याएर २ वटा गाउँपालिकाको ठूलो भाग सिञ्चित गर्ने गृहकार्य सुरु भइसकेपछि निकुञ्ज प्रशासनको अनुमति नदिँदा समस्या भएको उपभोक्ता समितिका सचिव सूर्य कोइरालाले बताउनुभयो ।
यता पर्सा राष्ट्रिय निकुञ्जका प्रवक्ता एवम् सहायक वार्डेन सन्तोष भगतले घोरे मसान शितलपुर सिँचाई आयोजना र यसको प्रशासनिक कामबारे अहिले आफूहरूलाई कुनै जानकारी नभएको बताउनुभयो ।
COMMENTS