काठमाडौँ । भूमि, व्यवस्था, सहकारी तथा गरिबी निवारण मन्त्री शशी श्रेष्ठले भूमि सम्बन्धी समस्या सदाका लागि अन्त्य गर्ने गरी कामलाई तीव्र बनाइएको बताउनुभएको छ ।
धनुषा जिल्लाको जनकपुर उपमहानगरपालिका वडा नं. १९ साबिकको वेगाशिपुर गा.वि.समा रहेको गाउँ ब्लकमा रहेकाहरूलाई लालपुर्जा वितरण गर्दै मन्त्री श्रेष्ठले कोही पनि वास्तविक भूमिविहीन भूमि पाउनबाट वञ्चित हुन नपरोस् भनेर अभियान नै सञ्चालन गरेर सरकारले लालपुर्जा वितरणको काम सुरु गरेको बताउनुभयो ।
मन्त्री श्रेष्ठले जमिन भएर पनि लालपुर्जा नहुँदा भूमिविहीन बनिरहेकाहरूको समस्या देशभरबाट अन्त्य गर्ने गरी सरकार लागिरहेको भन्दै वास्तविक भूमिहीन कोही पनि भूमि प्राप्त गर्नबाट वञ्चित नहुन र गलत मान्छेले भूमि नपाउन भन्नेमा सबै चनाखो बन्नुपर्नेमा पनि जोड दिनुभयो ।
मन्त्री श्रेष्ठले लालपुर्जाको अभावमा नागरिकता समेत प्राप्त नगर्ने र राज्यबाट प्राप्त हुने अधिकार उपभोग गर्न नपाइरहेको अवस्थाको अन्त्य हुनुपर्नेमा समेत जोड दिनुभयो ।
उहाँले भूमि विहीनहरूलाई लालपुर्जा वितरणको कामलाई पहिलो प्राथमिकतामा राखेर सरकार अगाडी बढिरहेको भन्दै संविधानमा व्यवस्था भएको भूमिहीन दलित, भूमिहीन सुकुम्वासीलाई जग्गा वितरण गर्ने र अव्यवस्थित बसोबासीको व्यवस्थापनको काम समेत सुरु भइसकेको बताउनुभयो ।
उहाँले राष्ट्रिय भूमि आयोगले हालसम्म २८ जिल्लामा काम सुरु गरिसकेको र ६८ स्थानीय तहसँग सम्झौता गरेर काम भइरहेको पनि जानकारी दिनुभयो ।
यसै क्रममा यसअघि मन्त्री श्रेष्ठले महोत्तरीको रामगोपालपुर, सप्तरीको अग्नीसाइर कृष्णसवरण र तिरहुत गाउपालिका, चितवनको इच्छाकामना गाउँपालिका र सिरहाको गाउँब्लकमा रहेकाहरूलाई जग्गाधनी प्रमाण पुर्जा वितरण गर्नुभएको थियो ।
२०२१ साल यता देशका विभिन्न जिल्लामा नापी हुँदा गाउँ ब्लकका रुपमा रही आफ्नो घर जग्गाको लालपुर्जा पाउन नसकेकाहरूलाई जग्गाधनी प्रमाण पुर्जा वितरण गर्न ढिलाइ गर्न नहुनेमा मन्त्री श्रेष्ठले जोड दिँदै आउनुभएको छ ।
COMMENTS