जनकपुरधाम । भारत सरकारले रामायण सर्किट अन्तर्गत भारतको अयोध्यादेखि जनकपुरधामसम्म रामजानकी पथ अन्तर्गत ४ लेनको अन्तर्राष्ट्रिय सडक मार्गको निर्माण गर्ने भएको छ ।
सडक मार्ग निर्माणका लागि केन्द्र सरकारले विहार सरकारलाई पत्राचार गरेको छ । उक्त सडक मार्गको २ सय ४० किलोमिटरमा अधिकांश भाग विहार तथा उत्तर प्रदेशमा रहेका छन् । नेपालको महोत्तरी जिल्लाको भिठामोड देखि जनकपुरधामसम्म २५ किलोमिटर क्षेत्र नेपाल तर्फ रहेको छ ।
नेपाल तर्फ करिब ४ लेनको सडक पहिला देखि नै भएपनि स्तरीय रहेको छैन । भारत सरकारले सडक निर्माण राष्ट्रिय सडक मार्गको मापदण्ड अनुसार निर्माण गर्ने भएपछि बलियो बन्ने विश्वास गरिइएको छ ।
भारतीय प्रधानमन्त्री नरेन्द्र मोदीले रामायण सर्किटको रुपमा विकास गर्नका लागि विभिन्न निर्देशन दिँदै आएपनि कार्यान्वयन पक्ष कमजोर रहेको आवाज उठ्दै आएको छ । जानकी पठको निर्माण प्रधानमन्त्री सडक निर्माण अन्तर्गत बन्ने भएको छ ।
यसको निर्माणले नेपाल भारत बीचको सम्बन्धलाई अझ बढी मजबुत बनाउने विश्वास रामायण सर्किटको क्षेत्रमा काम गर्दै आएका मिथिला अवध सांस्कृतिक संरक्षण परिषद्का उपाध्यक्ष सुनिल कुमार चौधरीले जानकारी दिनुभयो ।
भारत सरकारले विगतमा पनि धेरै घोषणाहरू गरे पनि हालसम्म कुनै कामकाज अगाडि नबढाएको बताउँदै चौधरीले यसलाई इमानदारिताका साथ कार्यान्वयनमा जोड दिएको खण्डमा दुवै देशका जनतालाई लाभ पुग्ने बताउनुभयो ।
सीतामढीवाट भिठामोडसम्म भारतीय भूमि नै भएकाले भारतीय रेलको विस्तार गर्दा पनि हुने बताउँदै उपाध्यक्ष चौधरीले लालु यादव विहारका मुख्यमन्त्री हुँदा त्यस विषयमा केही कामकाज पनि अगाडि बढेको बताउनुभयो ।
COMMENTS