धनुषा माघ १८, २०७८
मधेस सरकारको मंगलबार बसेको मन्त्रिपरिषद् बैठकले प्रशासनिक तथा आवासीय संरचना निर्माणका लागि एक समिति गठन गरेको छ । भौतिक पूर्वाधार विकासमन्त्री रामसरोज यादवको संयोजकत्वमा पाँच सदस्यीय समिति गठन गरिएको प्रवक्ता शैलेन्द्रप्रसाद साहले जानकारी दिए ।
सो समितिमा अर्थमन्त्री समेत रहेका प्रवक्ता साह, उद्योग, पर्यटन तथा वनमन्त्री शत्रुधन महतो, भूमि व्यवस्था, कृषि तथा सहकारी मन्त्री विजयकुमार यादव र आन्तरिक मामिला तथा सञ्चारमन्त्री भरतप्रसाद साह सदस्य रहेको उनले बताए ।
गठित गरिएको यस समितिले भवनसहितका स्थायी भौतिक संरचना निर्माणका लागि जग्गा खोजी गर्नेदेखि प्राविधिकलगायतका बजेट र सोको स्रोत व्यवस्थापनसम्मका लागि कार्य गर्ने अर्थमन्त्री साहले बताए ।
उनले यस समितिले विभिन्न प्राविधिक र अर्थ विज्ञसहितका व्यक्तिहरूलाई राखेर विज्ञ समिति गठन समेत गरिने बताए । अध्ययन समितिले बुझाएको प्रतिवेदनको आधारमा मधेश सरकारले काम कारवाही अघि बढाउने उनले बताए ।
प्रतिक्रिया